დღეს მოღუშული და წვიმიანი ამინდია, ასეთ დროს კი საუკეთესო გამოსავალი გემრიელად მოკალათება და კარგი ფილმების ყურებაა. გთავაზობთ სხვადასხვა ჟანრის ფილმებს ნებისმიერი გემოვნებისთვის, რომელ1იხალისებთ და უფრო სასიამოვნოს გახდის ისეთ წვიმიან დღეს, როგორიც დღესაა.

ყოველთვის თქვი დიახ (2008)

ზაფხულის წვიმა გვაგრილებს და დადებით ენერგიით გვავსებს, რასაც ვერ ვიტყვით ზამთრის წვიმაზე. ამიტომ უმჯობესია გაეხვიოთ პლედში და ჩაუჯდეთ პოზიტიურ ფილმს იმაზე, რომ თქვენს ცხოვრებას თავად მართავთ, ამიტომ სასიხარულოდ გექნებათ საქმე, თუ საწუწუნოდ, თქვენი ნებაა. ჯიმ კერის გმირმა საკუთარი ცხოვრების შეცვლა და ყველა შესაძლებლობის გამოყენება გადაწყვიტა. ფილმი თქვენც დაგეხმარებათ გარკვეული ზომების მიღებაში.

შოკოლადი (2000)

ლამაზი და ცხოვრებისეული ფილმი ნებისმიერ ამინდში სასიამოვნო საყურებელია, განსაკუთრებით კი წვიმიან, ცოტა რომანტიკულ ამინდში. ლას ჰალსტრომის ფილმში მოქმედება პატარა ფრანგულ ქალაქში ვითარდება, სადაც ფილმი მთავარგი გმირი უჩვეულო შოკოლადის მაღაზიას ხსნის. ჟულიეტ ბინოშის და ჯონი დეპის კინოწყვილი ერთ-ერთი ყველაზე დასამახსოვრებელია კინემატოგრაფიის ისტორიაში. ფილმი ოსკარის ხუთ კატეგორიაში იყო ნომინირებული, მათ შორის საუკეთესო სურათისთვის.

ლოთები (2013)

ჯო სვანბერგის ძალიან კარგი დამოუკიდებელი პროექტი, რომელიც ლუდსახარშ ქარხანაში მომუშავე ორ ადამიანზე მოგვითხრობს. ისინი მთელი დღეების მანძილზე სვამენ და ფლირტაობენ, იდეალურად შეეფერებიან ერთმანეთს, მაგრამ მათ უკვე ჰყავთ მეორე ნახევრები. რაც უფრო რეალურია ფილმი, მით უფრო ახლოს მიაქვს მაყურებელს ისტორია გულთან, ამ ფილმს კი ნამდვილად აქვს ეს პლუსი და სავსეა ცხოვრებისეული დიალოგებით.

შუაღამე პარიზში (2011)

ოუენ უილსონის პერსონაჟის შეხვედრების თვალყურის დევნა ერნესტ ჰემინგუეისთან, ფრენსის სკოტ ფიცჯერალდთან, კოკო შანელთან და სხვა ლეგენდებთან დიდი სიამოვნებაა. ვუდი ალენის მისტიკა უახსნელია, მაგრამ ის ყოველთვის ახერხებს მაყურებლის ემოციებზე თამაშს და საოცარი შთაბეჭდილებსი დატოვებას. ალენმა ოსკარი საუკეთესო ორიგინალური სცენარისთვის მიიღო.

სულელების ოქრო (2008)

თუ ცოტა ხნით მაინც გინდათ, რომ აღმოჩნდეთ ზაფხულში, ზღვაზე და მზიან ამინდში, ეს სათავგადასავლო მელოდრამა თქვენთვისაა. მეთიუ მაკკონაჰის და ქეით ჰადსონის პერსონაჟები ეძებენ ოქროს, რის პარალელურადაც ახერხებენ სირთულეების და ოჯახური კრიზისის დაძლევას. მოწყდით ცივ რეალობას და გაატარეთ სასიამოვნო და თბილი საღამო ფილმის პერსონაჟებთან ერთად.

სენსაცია (2006)

ვუდი ალენის კიდევ ერთი ფილმი. ულამაზესი სკარლეტ იოჰანსონით მოხიბლულმა რეჟისორმა სპეციალურად მისთვის დაწერა კომედიური სცენარი ახალგაზრდა ჟურნალისტზე, რომელიც შემთხვევით სენსაციურ ამბავს გაიგებს და იწყებს გამოძიებას. საინტერესო სიუჟეტი თავისი სიამარტივითა და ცოტა აბსურდულობით აუცილებლად მოიგებს თქვენს გულს.

იმიტაციის თამაში (2014)

ინტელექტუალური დრამაც არ არის ცუდი იდეა წვიმიან ამინდში, თუ მსგავსი ჟანრის ფილმები მოგწონთ. ფილმი ბრიტანელი კრიფტოგრაფის ალან ტიურინგის ისტორიას მოგვითხრობს, რომელმაც მეორე მსოფლიო ომის დროს გერმანული კოდის “ენიგმას” გატეხვა შეძლო, მოგვიანებით კი ჰომოსექსუალობის გამო ციხე მიუსაჯეს. ფილმმა მიიღო ოსკარი საუკეთესო ადაპტირებული სცენარისთვის.

მოკლე ვადა 12 (2013)

კარგი, კეთილი ფილმი, რომელიც თბილ და დადებით ემოციებს დაგიტოვებთ. ეს ღრმა, სოციალური დრამაა, რომელშიც რთულია არ თანაუგრძნოთ თითოეულ პერსონაჟს. ფილმის მთავარი გმირი, რომელსაც ბრი ლარსონი ასრულებს, ცდილობს დაეხმაროს დეპრესიულ და ფსიქიკური აშლილობის მქონე მოზარდებს, გაერკვას საკუთარ პირად ურთიერთობებში და საკუთარ ბავშვობის ტრამვაში.

უკანასკნელი სიყვარული დედამიწაზე (2011)

საკმაოდ ბევრი ფილმი ვიცით უტოპიასა და აპოკალიფსზე და მაყურებლის გაოცება სულ უფრო და უფრო რთული ხდება, მაგრამ დევიდ მაკენზის “უკანასკნელი სიყვარული დედამიწაზე” ნამდვილად არ გაგიცრუებთ იმედებს. ეს არ არის უბრალოდ მელოდრამა. უჩვეულო იდეა, რომელიც კიდევ ერთხელ შეგახსენებთ, რომ დააფასოთ ცხოვრება და არ შეგეშინდეთ სიყვარულის.

კადრს მიღმა (2013)

ღირსეული კომედია, რომელიც არ არის აზრს მოკლებული. როდესაც რაიმე სახის ხელოვნებით ხარ დაკავებული, ძალიან მნიშვნელოვანია არ დაკარგო საკთარი თავის რწმენა, რაც ხანდახან ძალიან რთულია, განსაკუთრებით რთული კი სამსახურის და ოჯახის ერთმანეთისგან გამიჯვნაა. ფილმი ასევე ეხება მშობლების და შვილების კონფლიქტს. უნდა აღინიშნოს, რომ ფილმის სცენარისტი და რეჟისორი ლეიკ ბელია, რომელიც თავადვე ასრულებს მთავარ როლს.