თბილისი, 17 მაისი — Sputnik. ცოტა ხნის წინ აღმოჩენილი 50-მეტრიანი ასტეროიდი სახელწოდებით 2023 DW, შესაძლოა, დედამიწას შეეჯახოს 23 წელიწადში, აცხადებს NASA-ს პლანეტარული თავდაცვის საკოორდინაციო სააგენტო.

მათი თქმით, ასტეროიდი, რომელიც მიმდინარე წლის 27 თებერვალს აღმოაჩინეს, დედამიწას სახიფათო მანძილზე 2046 წლის 14 თებერვალს მოუახლოვდება და 600-დან ერთი შანსი ექნება იმისა, რომ ჩვენს პლანეტას შეეჯახოს.

„ნასაში“ შეჯახების რისკს საშუალოზე მაღალ დონედ აფასებენ, თუმცა იმედი აქვთ, რომ საფრთხის დონე დროთა განმავლობაში დაიწევს — ასტეროიდზე უფრო მკაფიო დაკვირვების შედეგად მიღებული მონაცემების კვალდაკვალ.

„ძალიან ხშირად, როდესაც ახალ ობიექტებს ვპოულობთ, რამდენიმე კვირა მიდის იმაზე, რომ გაურკვევლობები აღმოვფხვრათ და მათი მომავალი ორბიტები სწორად გამოვთვალოთ. ანალიტიკოსები ასტეროიდ 2023 DW-ზე დაკვირვებებს განაგრძობენ და პროგნოზებში ცვლილებებს შეიტანენ ახალი მონაცემების საფუძველზე“, — აცხადებენ NASA-ში.

ამასთან კოსმოსური სააგენტოს ექსპერტები ხაზს უსვამენ, რომ ამ ზომის „ქვის“ დედამიწასთან შეჯახება კატასტროფული არ იქნება, თუ ის დიდ ქალაქში ან მჭიდროდ დასახლებულ რეგიონში არ ჩამოვარდება.

მიუხედავად იმისა, რომ 2023 DW-ის პლანეტასთან შეჯახების შანსები არც ისე დიდია, მეცნიერები მაინც აქტიურად მუშაობენ მსგავსი პოტენციურად სახიფათო ასტეროიდებისგან დედამიწის დაცვის მეთოდებზე. ცოტა ხნის წინ NASA-ს მეცნიერებმა ოთხი კვლევა გამოაქვეყნეს, რომლებიც ადასტურებს, რომ სწორედ სააგენტოს ქმედებებით გახდა შესაძლებელი მცირე ზომის ასტეროიდისთვის მიმართულების შეცვლა.